Upacara Adat Perpisahan Sunda

Upacara Adat Perpisahan Sunda

Pun sapun ka Maha Agung,

Ka Allah Illahi Robbi

Ya Allah pamuntangan beurang,

Ya Robbi pamantengan peuting

Sajatining pati hirup

Sajatining kalanggengan

Sumeja neda paralun, paralun kabudeur awun

Ka rumuhun ka karuhun

Seja amit kami mipit

Seja menta kami ngala

Ngunder tineung panasaran,

Mapay beja mangsa lawas

Tapak lacak na wiyata

Di lemah sarakan………..*)

(dieusi ku ngaran tempat, lembur, wewengkon)

Ngajungjung lungguhna elmu, komarana atikan

Ti mendi pipasinieun, ti mana picaritaeun

Urang nyoreang ka tukang, urang jujut hiji-hiji

Ngarah puguh nya pitutur, ti bihari ka kiwari

Agung…agung………

Lengser

Jep angin eureun heula, di dieu rek upacara

Jep sora repeh heula, aya nu rek cumarita

Tuh umbul-umbul, mani melengkung

Tah tanggara, tanda ngiberan

Nu ditunggu-tunggu rawuh

Nu dianti-anti sumping

Mangga urang sasarengan, mapag nu bade amitan

Cunduk waktu numbu catur, nyungsi pasini bihari

Subaya anu ti heula, munggaran jisim wawarti

Seja nyungsi nya pangarti, sangkan ilang nya katuna

Gending/Narasi marengan asupna rombongan gulang gulang ,pager ayu, sapasang wawakil siswa pinunjul kahiji dipayungan ku juru payung, nu ngagotong jampana/kurung manuk dieusi sapasang manuk japati, disatukangeunana dalapan  pasang siswa pinunjul, dituturkeun ku penari maktal anu mawa gugunungan.

Narator Geura lagukeun kidung liwung nu panungtung Geura hariringkeun kawih asih tina ati Sugan teteg ieu lengkah nu rek lunta Sugan jembar ieu lengkah rek paturay

Mun isuk balebat nyingray di wetan Srangenge sumirat deui di langit …………………..*) Boa saukur jadi kalangkang Kalangkang dina eunteung panineungan urang Mungguh ari waktu Kapan jamparing anu melesat Nyeak ninggalkeun patk demi patok lalakon Raca tapakna jadi pilar-pilar kakelar Tilu taun geuning geus kalaring, sempal guyon gogonjakan Silih asih ku pangarti Silih asuh ku kaweruh Ayeuna nincak mangsana urang paturay pajauh Pasini urang tepi ka dieu Lalakon urang tepi ka poe ieu Tali batin urang cangreud dina ati Baris nganteng jadi gurat panineungan Di dieu aya bagja jeung cimata Di dieu aya nu jajap jeung nu dijajapkeun Awor dina ringkang pileuleuyan Nu dikantun wuwuh ngungun Nanging bagja binarung bagja Ngungun soteh reh waktosna kedah pisah Nanging bagja sabab sirung baris renung Baris mangkak jadi wawangi lemah cai

Gending simpe

Kapala sakola dihaturanan ka panggung. Sapasang wawakil siswa pinunjul sungkem, nu sejenna milu diuk tarungkul disatukangeunana.

Gending ngeusian narasi

Narator  Bral, geura tandang neang kahayang Nyukcruk elmu nyungsi harti Muga jembar ku panalar Mugi sugih ku pangarti Bral, geura leumpang anaking Sing jucung ngudag kahayang Hidep dijajap du’a jeung cimata Dijajap du’a jeung cimata

Bral geura miang anaking Hidep dijurung lumaku Lumampah nyorang lalakon Nyaba ka jaganing jaga Neang hirup nu rahayu

Sabada acara sungkem, kapala sakola masrahkeun ijazah ka wawakil siswa, sasalaman ngawilujengkeun, tuluy ngalepaskeun japati sajodo tina jampana/kurung, minangka simbul paturay jeung pangjurung ka parasiswa. Barisan gugunungan malik-malikeun gugunungan masing-masing, luyu jeung gending, tepi ka kabaca aksara: PILEULEUYAN…..Prosesi rengse pamaen ka luar pentas.

Duh ibu punjungeun kalbu, nya Bapa pupujan rasa

Ninggang mangsana ayeuna, seja miang ngudar lengkah

Naratas jalan kabagjan, neda suka muga mulya

Anaking puputon ati, estu ewuh liwat saking Narah pajauh jeung hidep, tapi geus kitu kuduna Miang neang pangharepan, mapay raratan kabagjan Ujang Nyai simpay rasa, regepkeun piwulang Bapa Nu jujur mangka rahayu, nu sabar pinanggih mulya Lamun kasasar nya lampah, badan anu katempuhan Anaking jungjunan kalbu, Ibu jeung bapa tamada Teu bisa mekelan inya, ngan titip ieu pusaka Muga mangpaat jagana, ijasah tanda perceka

Narator Run turun ti kahyangan, lalayang salaka domas Dicangking ku Nyi Pohaci, disandang ku Sang dewata Run turun ti kaanggangan, kahayang jeung cita-cita Dipatri ku sanubari, dipelak jeroning sukma Teu burung cunduk waktuna, Lalayang enggeus kabandang Rep nyerep kana ati sanubari, Cik ngancik elmu teh kasakten diri Prak geura mencar nyiar luang, miang deui nyungsi deui Sabab elmu taya tungtung, nyaangan sapanjang jalan

Kapala Sakola sasalaman ngawilujengkeun, tuluy kaluar ti panggung dijajap ku Juru Payung

Narator Pileuleuyan, pileuleuyan, asal urang babarengan Nyukcruk elmu nyuprih harti, ayeuna baris paturay Nu kantun mulus rahayu, nu miang pinanggih bagja.

(pager ayu nyawer wawakil siswa, prosesi kaluar ti panggung)

Rampak sekar

Balebat

Bral geura miang, bral mangka tandang

Bral muga mekar, bral masing nanjung

Narator

Bral geura miang, dijajap rewu pangdu’a

Dirungrum pangjurung laku, mugia mulus rahayu

Mugia pinanggih bagja, bral geura miang

Geura tandang makalangan